أبرز ما جاء في الرسالة:

هيي اتجوزت حبيبها بسرعة من بعد الطلاق

فكركم راح الاقي حدى يعوضني عن كل الحرمان الي انحرمتو ؟

بحس انها صاحبه الي , مش ام بكل معنى الكلمة , ما بعرف ليش , لحد إس بحس انو الامان بعيد عني والحنيه ما بتعرفني

لما بنجتمع بمناسبة ابقى قاعدة معهن وتبقى مقابيلنا جمعة نسوان , انا الوحيدة من بين كل صحباتي ببلشن يحكين عني مش هاي الى امها دشرتها

وصلت الى موقع العرب رسالة من فتاة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية

مرحبا للجميع ,
انا بنت عمري ١٦ سنة , من الشمال , كثير تمينت اني الاقي حدى واحكيلو عن شو الي بحسو وشو الي بتمناه وقديش عنيت بإيام طفولتي الي ضاعت مني , بتمنى انكو تتفهمومني وانكو تحسو فيي ولو لشوي , لما بقى عمري سنتين الي جبوني ع هلدنيا اطلقو , هه , وسبب الطلاق هو خيانة الي جابتني للبابا , طبعاً لما عرف انها بتخونو مع واحد قريب عليه قرر انو يطلقها , فلما بلشو بإجراءات الطلاق هيي اتخلت عن الحضانه , ليش حسب رايكم ؟ طبعا عشان اتكمل حياتها وتتجوز الي بتحبو , وهيك انا ضليت مع البابا , هيي اتجوزت حبيبها بسرعة من بعد الطلاق , وما سألت عني , بجوز الي اتجوزتو منسيها بنتها الي من لحمها ودمها, المهم والبابا اتجوز بعد سنة من الطلاق , وكمان جاب ٣ ولاد منها (بنت ولدين) , وبعيطلها "ماما" , ربتني , كبرتني , بــــــــس ... 


صورة توضيحية

زوجة أبي صديقتي..
بحس انها صاحبه الي , مش ام بكل معنى الكلمة , ما بعرف ليش , لحد إس بحس انو الامان بعيد عني والحنيه ما بتعرفني , بقصد حنية الامومة والابوة . صح انو البابا ما تخلى عني ورباني , بس بحياتو ما حكى معاي زي العالم والناس , بحياتو ما قلي يا بابا انا بدي اوخذيك مشوار , بعمرو ما حط عيني بعينو وطلع علي على اني بنتو , لما بطلع بوجهي بكشر او بسرعه بلف وجهو , وحتى ع تعليمي ما بسأل , بهتم بأخواتي الثانيين أكتر مني , ع تعليمهم وع مشاويرهم وع مصروفهم , وطول نهارو بدلع وبغنيج فيهوم- بوسه من هون وتعا: يا بابا عشان ابوسك, او تعالي خذ يا بابا هاي مكافأة الك عشان عملت هيك- مش بس هوي هيك وطبعا الي ربتني , وأحيانا بحسها انها بتغار مني ما بتحب اختلط كثير ما البابا او احكي معاه أو اطلب من اي طلب.
 
أكره والدتي
المهم ,الي جباتني ما بعرف شكلها , ما بعرف اني هيي , ولا مرة سمعت صوتها , انا بكرها , اولا حرمتني من اني احس بحنية الامومة حرمتني أعيش طفولتي زييي زي باقي الناس , كثير بقيت بنت عنيفة ودايما اعمل مشاكل , بحياتي ما مسكت لعبة باربي او لعبة بتخص البنات , حركاتي وشغايلي مثل الولاد , وثانيا, لانها خاينة , وما سألت عني كل هاي السنين, ودايما بحس حالي مختلفة بشكل سلبي عن صحاباتي, مش عايشي زيهن.

 
مواقف محرجة
لما بنجتمع بمناسبة ابقى قاعدة معهن وتبقى مقابيلنا جمعة نسوان , انا الوحيدة من بين كل صحباتي ببلشن يحكين عني مش هاي الى امها دشرتها , كيف حياتها هاي , الله يعينها, انشاء الله ما بتطلع  زي الي دشرتها , ومن هل حكي. دايما بحاول انسها الي ظلمتني وحطتني بمواقف كلها ذل , بس لما تصير معي مشكلي بيني وبين الي ربتني بتصير تعايرني بأني انا وحدة حقيرة زي الي جابتني, بلشت اكبر يوم بعد يوم وعقلي يكبر معي وأفهم انا بأي دنيا عايشة ,وعرفت انو هذيكي مظلومي مع الي اتجوتو وعرفت انو بخونها ومعيشاها حياة حقارة بحقارها , هيك مصير كل وحدة بتترك ولادها من لحمها ودممها وخرجها الله لا يقيمها ... فكركم راح الاقي حدى يعوضني عن كل الحرمان الي انحرمتو ؟
معقول الاقي حدى يعوضني عن حنية الامومه؟ وهل بقدر اغير حياتي للأحسن ؟ بتمنى انكو ترشدوني شو اعمل او كيف اتصرف ..
وشكرا للجميع, موقع "العرب", ولزائري الموقع

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il