بِالحَظْر صُرنا

وْبالحَبِس جُوَّا البِيوت
هـَـالوَبــا طــوَّل عَلينـــا
وْمــا بِفــوت
نِشتـاق للنُّزهات ...
وْشّمَّات الهوا ....
وْسهراتنا الحلوات
عـا غِنْوِة هوى
هَالكون صاير بارِد
ضَمُّو سِكوت...!!
***
مشــتــاق لـَ لُعبــات
طــاوِلْة الزَّهِر
مـع حِـلـوِة الخيَّــات
تِـقْـهَرْنــي قَهِر
تِغْلِبنـي فــي فَيَّـات
شَجْرِةْ زَيْزَفون
تْخَسِّرني في لّحْظات ْ
خُبْزات الطَّبون
مَ تْخَلِّـي عِندي غـير
بيت العنكبوت!!
***
مِسبَحتي شو بِتكُر
خَرَز عَ الفَجِر
واليوم عَمْ بِيْمُر
أطوَل من دَهِر
هَالفيروس بِيْجُر
حَسرَه بالحَجِر
يا ويلي شو بِيْضُر
قاهِرني قَهِر
زَهَّقني شو بِيْقُر
ما بِعرِف سكوت!!

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان alarab@alarab.com